Chapter 1: The Girl Who Believed "Forever"
Main 10th class mein thi jab mujhe laga tha ki main pyaar samajh chuki hoon. Us age mein "forever" word fairy tale jaisa nahi lagta, bilkul real lagta hai. Aur jab woh meri life mein aaya, sab kuch movie jaisa feel hone laga.Woh meri class ka nahi tha, par pata nahi kaise baat shuru hui aur phir rukhi hi nahi. Ek simple "hi" se start hua conversation dheere dheere daily chats mein change ho gaya. Phir daily chats late night calls ban gaye. Aur main… main uski aadat ban gayi.Woh kehta tha, "Main kabhi tumhe chhodunga nahi."Woh kehta tha, "Shaadi bhi tumse hi karunga."Woh kehta tha, "Tum meri life ho."Aur main bina soche har baat par yakeen karti rahi. Boards ke time bhi hum future ke plans banate the. Kaun si city mein rahenge, kaise manage karenge, sab decide ho chuka tha — bas waqt aana baaki tha. Mujhe lagta tha main lucky hoon.Do saal tak mujhe kabhi serious doubt nahi hua. Haan, kabhi ladai hoti thi, kabhi woh thoda rude ho jata tha, par main har baar sochti thi — pyaar mein thoda attitude normal hota hai.Phir ek din mujhe kisi aur se pata chala ki woh mere saath serious nahi hai. Log keh rahe the ki main bas uske liye time pass hoon. Maine turant usse poocha. Usne hass ke kaha, "Tum bhi na, sabki baat maan leti ho." Aur main chup ho gayi… kyunki main uspar trust karti thi.Par asli sach tab saamne aaya jab hamari family ko hamare relationship ke baare mein pata chal gaya. Main darr gayi thi, par dil mein ek hi tasalli thi — woh mere saath khada rahega. Itne waade jo kiye the.Lekin usne sabke saamne jo kaha… usne mujhe andar se hila diya."Main isse baat nahi karta. Yeh hi mujhe message karke pareshan karti hai."Usne kaha main usko force karti hoon milne ke liye. Usne mujhe aise present kiya jaise main koi gold digger type ladki hoon.Us waqt meri awaaz hi nahi nikli. Do saal ka har call, har "I love you", har sapna ek second mein jhooth ban gaya. Main bas usse dekh rahi thi, shayad is umeed mein ki woh ek baar meri taraf dekhe aur sach bol de.Par usne meri taraf dekha bhi nahi.Us din ke baad sab normal dikhne laga… par mere andar kuch toot chuka tha. Mujhe samajh nahi aa raha tha ki zyada dard kis baat ka hai — uske jhooth ka ya meri bewakoofi ka.Kabhi kabhi aaj bhi main sochti hoon… agar main sirf time pass thi, toh us raat usne mujhe itni der tak call karke kya kaha tha?Aur sabse ajeeb baat…Us raat ke baad usne mujhe ek message bheja tha. Sirf ek line...Jo aaj tak kisi ko nahi pata…