Gau ka naam tha shivpur. Chota sa gau, jaha mitti ki soundhi khushubu or logon ke dilon mai bade-bade sapne baste the. Isi gau mai rehta tha vivek, 14 saal ka ek dubla-patla ladka, jiski aankhon mai har samay ek hi sapna chamakta rehta tha - Bharat ke liye cricket khelna.
Vivek ka din sooraj nikalne se pehle suru hota tha, jab pura gau so raha hota, tab vo apna purana sa balla lekar khet ke pass bani khali zameen par pahunch jata, wahi uski pitch thi, wahi uska stadium, na koi darshak, na koi camera, bas samne lakdi ke teen tute huye dande, jo uske liye wicket the.
Uske pita, rajkumar verma, ek sadharan driver the. Mehnati, imandar, lekin halaton se thake huye. Maa, premshri verma, ghar sambhalti thi or bete ke sapno ko chupchap apne anchal me bandhkar rakhti thi.
Ek subah, jab Vivek abhyas se lauta, pita ne kadak aawaz me kaha, kitni baar kaha hai, ye khel-vel chod de. Padhai par dhyan de. Cricket se pet nahi bharta.
Vivek chup raha. Usne kuch nahi kaha. Lekin uske andar jaise koi toofan chal raha tha. Use pata tha ki pita ji galat nahi hain, lekin uska dil sirf cricket ki dhadkan samajhta tha. School mein Vivek padhai me thik-thak tha. Magar khel ke maidan mai vah alag hi khiladi ban jata. Uski cover drive itni khubsurat hoti ki teacher tak ruk-ruk kar dekhne lagte. Tez gendbazo ke samne bhi vah bina dare khada rehta.
Ek din school mai jila stareey cricket chayan ki ghosna huyi. Jo khiladi chune jate, unhe sehar ki academy mai training milti. Vivek ki aankhon mai chamak aa gayi. Yahi mauka hai, usne khud se kaha.
Chayan ke din maidan khiladiyon se bhara tha. Achche joote, branded bat, coach ke sath aaye ladke. Vivek wahi khada tha - fate joote, purana balla or dil mai aag.
Jab uski baari aayi, usne pehla hi shot aisa maara ki gend sidhi boundry ke paar chali gayi. coachon ki nazrein us par tik gayi. Ladka achcha khelta hai. Ek coach ne kaha.
Vivek ne us din 72 run banaye. Nabaad.
Shaam ko jab wah ghar pahuncha, to uski maa ne muskurate huye poocha, kaisa gaya beta?
Maa, mera selection ho gaya. Vivek ki aawaz kaanp rahi thi.
Maa ki aankhon me aanshu aa gaye. Khushi ke aanshu. Lekin pita chup the.
Raat ko khana khate samay Rajkumar verma ne kaha, sehar jana aasan nahi hai. Paise kaha se aayenge?
Kamre mai sannata cha gaya.
Vivek ne dheere se kaha, Mein mehnat karunga, papa. Ek din apko mujh par garv hoga. Pita ne uski taraf dekha. Pehli baar unhe apne bete ki aankhon me sirf sapna nahi, zidd or aatmvishvas dikha.
Kuch dino baad Vivek sehar ki cricket academy pahucha. Bade- bade maidan, net practice, fitness training - sab kuch naya tha. Shuru mai use muskil huyi. Sehar ke ladke tez the, chalak the. Kai baar wah out ho jata, kai baar coach dant te.
Ek din wah thak kar maidan ke kone mai baith gaya. Aankhon mai aanshu the. Tabhi caoch Sachin sir uske pass aaye. Ro kyu raha hai?
Sir, sayad me yaha ke layak nahi hu.
Sachin sir muskuraye. Agar talent kaafi hota, to mehnat bekar hoti. Or agar mehnat kaafi hoti, to talent ki kami nahi rehti.
Utho.
Vivek utha. Us din ke baad usne khud se ek promise kiya - Haar nahi manuga.
Din - raat abhyas, fitness, diet - sab badal gaya. Mahino ki mehnat ke baad uska khel nikharne laga.
Ek bade tournament mai use khelne ka mauka mila.
Pura stadium bhara tha. Pehli baar usne itna shor suna. Dil tez dhadak raha tha.
Lekin jaise hi usne balla uthaya, use gau ki vo mitti yaad aa gayi, vo tuti huyi wicket, maa ki muskan or pita ki ummeed.
Usne pehli gend par single liya.
Fir chauka. Fir chakka.
Stadium taaliyon se goonj utha.
Us din Vivek ne satak banaya. T.V. par uska naam chamka. Gau me log khushi se jhoom uthe. Pita ne chupchap T.V. ki or dekha, aankh nam thi. Mera beta... unhone bas itna kaha.
Yah sirf suruaat thi.
Sapno ki pitch par Vivek ne pehla khubsurat kadam rakha....
😍 thanks for read 💗
💌 wait for next part... 💕
🏏 cricket ki duniya 🌏